Глас 2. Во вторник утром. Тропари и стихиры на каждый день

Седа́льны покая́нны. Гла́с 2:

Помышля́ющи, душе́ моя́, стра́шнаго дне́ испыта́ния, трепе́щи воздая́ния ве́чныя му́ки, и покая́нием возопи́й слезя́щи: Бо́же согреши́х, поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Испыту́яй мою́ со́весть осужде́нную, бою́ся Твоего́ стра́шнаго суди́ща, Го́споди, я́ко не́сть ми́ от де́л спасе́ния: но я́ко име́яй бога́тство благоутро́бия, уще́дри мя́ Христе́ Бо́же и спаси́ мя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Тя́ велича́ем, Богоро́дице, вопию́ще: ра́дуйся Же́зле, от него́же безсе́менно Бо́г прозябы́й, погуби́ на дре́ве сме́рть.

Седа́льны. Гла́с 2.

Поми́луй мя́, рече́ Дави́д, и а́з Тебе́ зову́: согреши́х, Спа́се, моя́ грехи́ покая́нием очи́стив, поми́луй мя́.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Поми́луй мя́, Бо́же, поми́луй мя́, о двою́ греху́ пла́каше Дави́д, о тьма́х а́з согреше́ниих вопию́ Ти: Он посте́лю слеза́ми омочава́ше, а́з же ни ка́пли еди́ныя и́мам, отча́яхся и молю́: поми́луй мя́, Бо́же, по вели́цей ми́лости Твое́й.

Сти́х: Ди́вен Бо́г во святы́х Свои́х, Бо́г Изра́илев.

Просвети́вый святы́я Твоя́ па́че зла́та, и просла́вивый преподо́бныя Твоя́, я́ко бла́г, те́ми умоля́ем быва́я, Христе́ Бо́же, живо́т на́ш упра́ви, я́ко Человеколю́бец, и моли́тву напра́ви я́ко кади́ло, Еди́не во святы́х почива́яй.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Богоро́дице, не пре́зри мене́ тре́бующа заступле́ния, е́же от Тебе́: на Тя́ бо упова́ душа́ моя́, поми́луй мя́.

Седа́льны. Гла́с 2.

Благоутро́бия незави́стный исто́чник, во Иорда́не погрузи́л еси́ струи́ Иоа́нне отню́дуже приле́жно молю́ Тя: страстьми́ мно́гими потопля́ема, пучи́ною мя́ жите́йскою, на вся́кий де́нь лю́то, благоприя́тными Твои́ми моли́твами, к живота́ приста́нищу руководи́.

Благоутро́бия ра́ди ми́лости, Бла́же, спасти́ Твое́ созда́ние, Христе́, прише́л еси́, прекло́нь Небеса́ схожде́нием Твои́м. Те́мже стра́шное смотре́ние Твое́ пою́ще, вопие́м Ти́: мольба́ми Предте́чи Твоего́ очище́ние грехо́в пода́ждь на́м, я́ко Еди́н благоутро́бен.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Кто́ ви́де, кто́ слы́ша Ма́терь ражда́ющую своего́ соде́теля неискусому́жно, доя́щую даю́щаго пи́щу вся́кой пло́ти? Оле чудесе́! Престо́л херуви́мский яви́ся чре́во Твое́, Богоро́дице благода́тная, моли́ о душа́х на́ших.

На стихо́вне стихи́ры умили́тельны, гла́с 2:

Все́х превосхожду́ грехо́м, кого́ научу́ покая́нию? Аще воздохну́ я́ко мыта́рь, непщу́ю отягчи́ти небеса́: а́ще слезю́ я́коже блудни́ца, оскверня́ю слеза́ми зе́млю. Но да́ждь ми́ оставле́ние грехо́в, Бо́же, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Беззако́ния моя́ пре́зри, Го́споди, от Де́вы рожде́йся, и се́рдце мое́ очи́сти, хра́м сие́ творя́ свята́го Твоего́ Ду́ха: не отве́ржи мене́ от Твоего́ лица́, безме́рную име́яй ве́лию ми́лость.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Кре́ст Христо́в взе́мше святи́и му́ченицы, ору́жие непобеди́мое, всю́ диа́волю си́лу упраздни́ша, и прие́мше венцы́ небе́сныя, стена́ на́м бы́ша, о на́с тому́ моля́щеся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Ра́дуйся, Мари́е Богоро́дице, хра́ме неразруши́мый, па́че же святы́й, я́коже вопие́т проро́к: свя́т хра́м Тво́й, ди́вен в пра́вде.

Блаже́нна, гла́с 2:

Гла́с Ти́ прино́сим разбо́йничь, и вопие́м Ти́: помяни́ на́с, Го́споди, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Разбо́йника превзыдо́х, и блудни́цу страстьми́: уще́дри мя́, Спа́се, самоосужде́ннаго.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Погрузи́вый бе́здну благоутро́бия в воде́, Предте́че, твои́ми моли́твами стра́сти моя́ ума́ли.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: И́же преле́стная тече́ния, крове́й тече́ньми изсуши́вше, Христо́вы страстоте́рпцы, досто́йно сла́вими есте́.

Сла́ва Отцу́ и Сы́ну и Свято́му Ду́ху:

Вети́йствуяй, я́коже пи́сано е́сть, у́м челове́ческий не мо́жет Божества́ еди́но нача́ло пе́ти триипоста́сное.

И ны́не и при́сно и во ве́ки веко́в. Ами́нь:

Богоро́дичен: Я́же неопа́льно ро́ждшую Бо́га пребезнача́льна, похва́льными вси́ пе́сньми непреста́нно воспои́м.